Владата на Северна Македонија на денешната редовна 138. седница прогласи седумдневна кризна состојба во снабдувањето со електрична енергија, поради отежнатата набавка на мазут, соопшти кабинетот.
Одлуката следува по барање на Електрани на Северна Македонија (ЕСМ) за овозможување користење на државните резерви на мазут, со цел да се обезбеди стабилно греење и непречено производство на електрична енергија.
Министерката за енергетика, Сања Божиновска, изјави дека државата располага со доволни резерви на мазут и дека нема да има енергетска криза или рестрикции на струја за домаќинствата.
„Нема да има никаква криза, државата има резерви од мазут, и ЕСМ може непречено да се снабдува со нив“, рече Божиновска.
Кризната состојба ќе трае седум дена и се однесува на целата територија на земјата, како мерка за брзо реагирање во случај на евентуални нарушувања во снабдувањето со електрична енергија.