Опозициската Демократска унија за интеграција побара итна истрага против директорот на МЕПСО, Бурим Латифи, поради, како што тврди, нанесена штета од 6 милиони евра на државниот буџет.
Партијата наведува дека штетата произлегува од одлука на меѓународен арбитражен трибунал, кој ја обврзал државата да исплати обештетување на компанија од Босна и Херцеговина, по раскинување на претходен договор.
Според ДУИ, раководството на МЕПСО ја раскинало соработката со компанијата „Енергоинвест“ од Сараево и склучило нов договор со „ЕЛНОС БЛ“ од Бања Лука, што, како што се наведува, довело до арбитражен спор.
Одлуката на трибуналот ги отфрлила сите контратужби на МЕПСО во вредност од 19,3 милиони евра и ѝ признала право на обештетување на тужителската страна во износ од 6 милиони евра.
ДУИ оцени дека станува збор за одлуки кои директно го оштетиле јавниот интерес и побара Јавното обвинителство да отвори кривична постапка за злоупотреба на службената положба и нанесување штета на буџетот.
Партијата исто така повика на целосна ревизија на договорите склучени во мандатот на директорот, како и на привремено суспендирање на актуелните договори додека не се разјаснат сите околности.
„Шест милиони евра од буџетот се цената на политичките именувања“, соопштија од ДУИ, додавајќи дека одговорност мора да има.