Пет политички субјекти од албанскиот блок најавија обединување во единствена политичка структура под името ВЛЕН (ВРЕДИ), оценувајќи дека станува збор за нов почеток во политичкото претставување на Албанците во земјата.
Во заедничкиот настап се наведува дека обединувањето има за цел да стави крај на, како што се оценува, долгогодишната фрагментација, политички поделби и влијанија на тесни интереси во албанскиот политички кампус.
„Пет субјекти стануваат едно. ВЛЕН едно“, се наведува во пораката, со акцент дека новиот политички субјект ќе се темели на владеење на правото, борба против корупцијата и европска ориентација.
Иницијаторите велат дека обединувањето е одговор на незадоволството од досегашниот модел на политичко делување, кој, според нив, бил обележан со клиентелизам и недоволна отчетност.
Во изјава за Алсат, еден од основачите на Алијансата за Албанците, Латиф Арифи, оцени дека дел од поранешното раководство на партијата во клучни моменти застанало на страната на Демократската унија за интеграција, наместо да поддржи политички промени.
„Во клучните моменти тие станаа поддршка за ДУИ“, изјави Арифи, додавајќи дека значителен дел од структурата на партијата, од Струга до Куманово, сега е дел од новото обединување.
Новата политичка платформа најавува фокус на судска независност, евроинтеграции, партнерство со НАТО, како и заштита на културниот и националниот идентитет.
Политички аналитичари оценуваат дека обединувањето може да има значајно влијание врз албанскиот политички блок, особено во пресрет на идни изборни циклуси, но предупредуваат дека неговата реална тежина ќе зависи од способноста за задржување на единството и довербата кај гласачите.
„ВЛЕН доаѓа. Ако не денес, кога?“, се наведува во пораката на новоформираниот блок.