Германскиот министер за надворешни работи Јохан Вадефул побара Европската унија да го напушти принципот на едногласно одлучување во надворешната и безбедносната политика, предупредувајќи дека блокадите од поединечни земји ја прават Унијата неделотворна.
„Ако сакаме ЕУ да биде вистински глобален фактор, мора да го укинеме ветото пред крајот на овој мандат“, изјави тој, нагласувајќи дека сегашниот систем ја спречува брзата реакција во кризни ситуации.
Вадефул се залага за премин кон квалификувано мнозинство – систем кој веќе се користи во други области. Според него, искуствата со војната во Украина и санкциите против Русија покажале дека едногласноста го забавува процесот на донесување одлуки.
Во рамките на Советот на ЕУ, одлуките во чувствителни области сè уште бараат согласност од сите членки, што значи дека една земја може да го блокира целиот процес. Наспроти тоа, квалификуваното мнозинство овозможува одлука да се донесе со поддршка од најмалку 55% од државите кои претставуваат најмалку 65% од населението на Унијата.
Како актуелен пример за проблемот се посочува Унгарија, која го блокира финансискиот пакет за Украина. Премиерот Виктор Орбан ја оправдува позицијата со енергетски причини, додека критичарите сметаат дека станува збор за политичка тактика пред изборите.
Дебатата за укинување на ветото не е нова, но се интензивира во услови на зголемени геополитички тензии и притисок врз ЕУ да дејствува побрзо и поединствено на глобалната сцена.