Маж загина во неделата попладне при несреќа со топ за време на традиционална манифестација во Двор Велики Табор, во општина Десиниќ, во хрватското Загорје, соопшти полицијата.
Полициската управа Крапина-Загорје соопшти дека пријавата за настанот била примена околу 15:15 часот преку Центарот 112 и дека е во тек увид и кривична истрага за околностите под кои дошло до фаталниот истрел.
Хрватски медиуми, повикувајќи се на сведоци, објавија дека топот неколку пати не испукал, по што ненадејно се активирал во момент кога жртвата му се приближила за повторно полнење.
Според ХРТ, станува збор за 55-годишен маж, член на локално здружение, но полицијата засега не објави официјален идентитет на жртвата.
Несреќата се случила пред бројни посетители на настанот, а лекарските екипи кои пристигнале на местото можеле само да констатираат смрт.