САД ова лето ќе издадат ограничена серија пасоши со ликот на претседателот Доналд Трамп, како дел од одбележувањето на 250-годишнината од независноста на земјата.
Новите документи ќе ја содржат фотографијата на претседателот на внатрешната страна на корицата, опкружена со текст од Декларацијата за независност и мотиви од американското знаме, додека неговиот потпис ќе биде прикажан со златен фонт. Посебна страница ќе ја прикажува познатата слика на основачите на САД при потпишувањето на декларацијата.
Од Стејт департментот соопштија дека пасошите ќе имаат „прилагодена уметничка обработка и подобрени визуелни елементи“, задржувајќи ги постојните безбедносни карактеристики.
Овие пасоши се дел од пошироката програма „America250“, која вклучува и други настани како трка од Формула на Националниот мол во Вашингтон и борба на УФЦ во дворот на Белата куќа.
Владата не прецизираше колку вакви пасоши ќе бидат издадени, но нагласи дека станува збор за ограничено издание по повод „историскиот јубилеј“.
Ова е само еден од низата потези со кои ликот на претседателот се појавува на јавни институции и документи. Неговата фотографија веќе се користи на некои федерални објекти, а предложени се и нови монети и комеморативни изданија со неговиот лик.
Проектот предизвикува различни реакции во јавноста, дел од кои го гледаат како одбележување на јубилејот, додека други го оценуваат како политичка персонализација на државните симболи.