Пратеничката група на СДСМ поднесе предлог-измени на Законот за Влада по скратена постапка, со кои се предвидува забрана за двојно државјанство да важи за министрите, вицепремиерите и целиот состав на Владата, и тоа со итна примена.
Од СДСМ соопштија дека со овој чекор се воспоставува принцип на еднаквост за сите избрани и именувани функционери.
„Со ова, СДСМ поставува јасен принцип: исти правила мора да важат за сите избрани и именувани функционери, без исклучок и тоа веднаш“, наведуваат од партијата.
Партијата ја критикува иницијативата на ВМРО-ДПМНЕ за измени на Законот за пратеници, оценувајќи дека предложените решенија не се применуваат на актуелниот состав на парламентот.
„Според нивниот предлог, овие измени би важеле дури од наредниот парламентарен состав, а не за актуелните пратеници“, велат од СДСМ, додавајќи дека таквиот пристап, според нив, има за цел да ги заштити актуелните функционери со двојно државјанство.
СДСМ најави дека, покрај предлогот за измени на Законот за Влада, ќе поднесе и амандмани на законското решение предложено од ВМРО-ДПМНЕ, со цел забраната за двојно државјанство да стапи во сила веднаш.
„Двојно државјанство нема да има пратеник ниту избран и именуван функционер, и тоа да важи веднаш“, се додава во соопштението.