Водителот на доцновечерното шоу Џими Кимел изјави дека неговата шега не претставувала повик за атентат, откако претседателот Доналд Трамп и првата дама Меланија Трамп побараа негово отпуштање по обидот за напад за време на вечерата на Асоцијацијата на дописници од Белата куќа.
Кимел во понеделникот вечерта ја бранеше својата изјава од минатата недела, нагласувајќи дека „не беше, по никаква дефиниција, повик за атентат“. Тој додаде дека шегата била „очигледно“ за разликата во возраста меѓу претседателот и првата дама, и саркастично за „радоста што се гледа на нејзиното лице секојпат кога се заедно“.
Контроверзата избувна по инцидентот во саботата, кога вооружен маж се обиде да помине безбедносен пункт на настанот. Осомничениот, 31-годишниот Кол Томас Ален, е обвинет за обид за атентат врз претседателот и за кривични дела поврзани со оружје.
Кимел рече дека му е жал што претседателот и другите присутни го доживеале инцидентот, опишувајќи го како „трауматичен и застрашувачки“, иако нема жртви, додавајќи дека со години јавно зборува против насилството со оружје.
Претседателот Трамп остро реагираше, оценувајќи ја изјавата како „одвратен повик на насилство“ и повика телевизиската мрежа ABC веднаш да го отпушти комичарот.
Првата дама Меланија Трамп изјави дека Кимел „придонесува за политичката болест во Америка“ и повика мрежата да преземе мерки, додавајќи дека „луѓе како него не треба да имаат можност секоја вечер да влегуваат во домовите и да шират омраза“ .
Белата куќа дополнително ја засили критиката, прашувајќи „кој воопшто би рекол дека една сопруга би изгледала среќна при можноста за убиство на својот сопруг“, алудирајќи на контроверзната шега на Кимел.
Случајот отвори поширока дебата во САД за границите на слободата на говор, политичката сатира и одговорноста на јавните личности во време на зголемени тензии и политичко насилство.