Германскиот канцелар Фридрих Мерц се обиде да ја намали тензијата со американскиот претседател Доналд Трамп, откако Пентагон најави дека САД ќе повлечат 5.000 војници од Германија, најголемата американска воена база во Европа, објави Ројтерс.
Мерц изјави дека мора да прифати оти Трамп има различни ставови за одредени прашања, но нагласи дека тоа не ја менува важноста на партнерството со САД во рамките на НАТО.
„Морам да прифатам дека американскиот претседател има поинаков став за овие прашања од нас. Но, тоа не го менува фактот дека останувам убеден оти Американците се важни партнери за нас“, рече Мерц во интервју за германскиот јавен сервис АРД.
Канцеларот ги отфрли тврдењата дека одлуката за намалување на американското воено присуство е поврзана со неговите критики за американската политика кон Иран. Претходно, Мерц праша дали Трамп има излезна стратегија за Блискиот Исток и оцени дека САД се „посрамотени“ во разговорите со Техеран. Трамп потоа го нарече Мерц „неефикасен“ лидер.
„Нема врска“, рече Мерц на прашањето дали повлекувањето на војниците е последица на спорот меѓу двајцата лидери.
Трамп уште во првиот мандат бараше намалување на американското воено присуство во Германија и повеќепати ги повикуваше европските сојузници да преземат поголема одговорност за сопствената безбедност.
Најавата од Вашингтон се толкува и како напуштање на планот од администрацијата на Џо Бајден за распоредување американски баталјон со далекудометни ракети „Томахавк“ во Германија.
Тоа претставува удар за Берлин, кој го сметаше планот за важен елемент на одвраќање против Русија, додека европските земји развиваат сопствени системи со долг дострел.
Мерц рече дека Трамп никогаш не се обврзал на тој план и додаде дека е малку веројатно САД да се откажат од такви системи, бидејќи, според него, „Американците во моментов немаат доволно од нив“.