Министерот за надворешни работи и надворешна трговија Тимчо Муцунски изјави дека НАТО денес е „посилен од кога било“, оценувајќи дека тоа е резултат на политиките на американскиот претседател Доналд Трамп и американското раководство.
Во интервју за „Еуроњуз“, Муцунски рече дека Алијансата значително зајакнала по самитот во Хаг минатата година, кога членките се обврзале да ги зголемат трошоците за одбрана на 5 проценти од БДП до 2035 година.
„Благодарение на претседателот Трамп, Марко Рубио и целокупниот американски надворешнополитички апарат, НАТО е посилен од кога било“, изјави Муцунски.
Тој оцени дека безбедносните закани од руската агресија врз Украина, но и состојбите на Блискиот Исток и во Индо-Пацификот, ја прават оваа агенда неопходна.
„Трамп му даде будење на НАТО“, рече Муцунски, додавајќи дека несогласувања меѓу сојузниците постоеле и претходно, но дека темелите на Алијансата остануваат цврсти.
Изјавите на Муцунски доаѓаат во време кога дел од европските лидери изразуваат загриженост поради односот на Трамп кон НАТО и неговите критики кон европските сојузници.
Американскиот претседател во повеќе наврати ги обвини европските членки за недоволно издвојување за одбраната, а неодамна се закани и со повлекување американски трупи од Германија.
Муцунски истакна дека членството на Северна Македонија во НАТО од 2020 година донело стабилност во, како што рече, „екстремно нестабилен регион“.
Во интервјуто тој говореше и за евроинтеграциите, оценувајќи дека Бугарија останува главната пречка на патот на Северна Македонија кон Европската Унија.
Според него, Софија треба да покаже подготвеност за дијалог, додека застојот создава простор за „малигно влијание“ од Русија и Кина.
„Хибридните закани растат таму каде што има фрустрација и недоверба“, изјави Муцунски.
Сепак, тој нагласи дека државата останува јасно ориентирана кон Западот.
„Ние сме држава што не е само реторички проевропска, туку европските вредности ги применува во пракса“, рече министерот.
Според анкета на Институтот за демократија „Социетас Цивилис“ од јануари 2026 година, околу 70 проценти од граѓаните би гласале за членство во Европската Унија, иако многумина не веруваат дека Унијата навистина ќе ги отвори вратите за земјата.