Германската авиокомпанија Луфтханза ќе ги суспендира летовите меѓу Франкфурт и Скопје најмалку еден месец, објави EX-YU Aviation News.
Последниот лет на оваа линија е планиран за 31 мај, по што во текот на јуни нема закажани летови. Според моменталниот распоред, операциите треба да продолжат од 1 јули, но компанијата сè уште не го финализирала ажурираниот ред на летање.
До 16 мај Луфтханза ќе продолжи со секојдневни летови меѓу Франкфурт и Скопје, а потоа фреквенцијата ќе се зголеми на девет до десет летови неделно до крајот на мај. Пред последната ревизија на распоредот, компанијата планирала да лета десет пати неделно и во текот на јуни.
Одлуката доаѓа по турбулентен период за Луфтханза, кој беше погоден од штрајкови, затворање на подружницата CityLine и суспензија на повеќе линии. Компанијата истовремено го ревидира и распоредот од Франкфурт, отстранувајќи повеќе дестинации од својата мрежа.
Само оваа недела Луфтханза скратила 944 неделни летови за јуни, 258 за јули, 250 за август, 260 за септември и уште 258 неделни летови за октомври.
Луфтханза ја отвори линијата Франкфурт–Скопје во април 2023 година. Минатата зима компанијата веќе направи значителни кратења на летовите кон македонската престолнина, намалувајќи ги планираните десет неделни ротации на само три неделно во февруари и март.
Пошироката група Луфтханза ја забрзува консолидацијата на европските мрежи преку своите хаб-компании: Луфтханза, Свис, Аустриан ерлајнс, Брисел ерлајнс и ИТА ервејс. Овој процес следи по програмата „Matrix Next Level“, реструктурирање насочено кон централизација на операциите во рамки на групацијата.
Суспензијата на линијата може да ги погоди патниците од Македонија кои Франкфурт го користат како главен центар за поврзување со европски и интерконтинентални дестинации.