Американскиот претседател Доналд Трамп го обвини својот претходник Џо Бајден за „опаѓањето“ на Соединетите Држави, реагирајќи на коментарите на кинескиот претседател Си Џинпинг за односите меѓу Вашингтон и Пекинг за време на нивната средба во Кина.
Во објава на социјалната мрежа „Трут Соушл“, Трамп наведе дека Си „елегантно“ ја опишал Америка како држава во пад, но додаде дека тоа се однесувало на периодот на администрацијата на Бајден.
„Нашата земја страдаше неизмерно поради отворени граници, лоши трговски договори, криминал и многу други работи“, напиша Трамп.
Коментарите следуваат по средбата меѓу двајцата лидери во Пекинг, каде што Си Џинпинг повторно се повика на концептот познат како „Тукидидова стапица“ – теорија според која конфликт може да стане неизбежен кога растечка сила се заканува да ја замени доминантната светска сила.
Си предупреди дека прашањето за Тајван претставува „најважно прашање“ во односите меѓу Кина и САД и оцени дека погрешно управување со кризата би можело да доведе до „опасна конфронтација“ меѓу двете држави.
Трамп, пак, оцени дека односите меѓу Вашингтон и Пекинг би можеле да бидат „подобри од кога било“, додавајќи дека Кина и САД имаат интерес да избегнат директен судир.
„Сега Соединетите Држави се најжешката држава во светот“, напиша Трамп, нагласувајќи дека неговата администрација за 16 месеци постигнала „спектакуларен подем“.
Средбата во Пекинг се одржува во услови на растечки тензии меѓу двете сили околу Тајван, трговијата, технологијата и војната во Иран. Аналитичарите оценуваат дека повикувањето на „Тукидидовата стапица“ е обид на Пекинг да предупреди на ризикот од директен конфликт меѓу двете најголеми светски економии.