Нови политички обвинувања беа упатени кон лидерот на ЗНАМ и градоначалник на Куманово, Максим Димитриевски, откако на социјалните мрежи беа објавени тврдења дека е сопственик на фирма регистрирана во Бугарија.
Според објавата, компанијата „МБС ГЛОБАЛ“ била регистрирана во Бургас на 7 август 2015 година и се занимавала со трговија на големо со непрехранбени производи.
Во објавата се тврди и дека сопругите на Димитриевски и Серафимовски имаат заедничка компанија во Македонија, „АЈФИКС ДОО“ од Доброшане, Куманово.
Авторот на објавата упатува серија обвинувања кон Димитриевски, прашувајќи колку фирми поседува во Бугарија и Македонија, како и дали преку блиски лица и кумови биле префрлани пари и местени тендери.
Во текстот се обвинува и владејачката ВМРО-ДПМНЕ, како и премиерот Христијан Мицкоски, за наводна поврзаност со криминал и корупција.
„Доста е веќе да вие поради вашиот криминал и корупција го држите народот како заложник и ја држите државата во изолација“, се наведува во објавата.
Засега нема официјална реакција од Максим Димитриевски, ЗНАМ или од ВМРО-ДПМНЕ во врска со изнесените тврдења.