Американскиот секретар за одбрана Пит Хегсет се соочи со остри критики од историчари, академици и активисти за човекови права откако на церемонијата по повод 82-годишнината од Денот Д во Нормандија ја поврза миграцијата кон Европа со „инвазија“.
Говорејќи на американските воени гробишта во Колвил-сур-Мер, Хегсет изјави дека денес европските брегови се соочуваат со „различни и опасни идеологии“, додавајќи дека на плажите во Шпанија, Италија, Грција и Бугарија пристигнуваат чамци со мигранти.
„Луѓето кои се бореа и загинаа овде ја вратија слободата во Европа. Таа слобода мора да биде зачувана од сегашната генерација лидери“, рече Хегсет.
Неговите изјави предизвикаа силни реакции на социјалните мрежи и во јавноста.
Британскиот историчар Сајмон Шама оцени дека станува збор за „мешавина од историска глувост, гротескна глупост и апсурдно чувство на сопствена важност“.
Израелскиот адвокат за човекови права Даниел Зајдеман изјави дека говорот претставува „навреда за споменот на војниците кои ги нападнаа плажите на Нормандија и особено за оние кои загинаа“.
Критики упати и шведскиот економист Андерс Ослунд, кој оцени дека Хегсет испратил спротивставени пораки со истовремените тврдења дека САД стојат покрај своите европски сојузници.
Контроверзите доаѓаат во период кога администрацијата на американскиот претседател Доналд Трамп сè почесто ја критикува европската миграциска политика.
Неколку дена пред посетата на Хегсет во Франција, локални здруженија во Нормандија побараа неговото доаѓање да биде откажано, обвинувајќи го дека промовира ставови спротивни на демократијата, човековите права и меѓународната соработка.
И покрај критиките, американската администрација не се огласи со дополнително појаснување на изјавите на Хегсет, кои продолжуваат да предизвикуваат реакции од двете страни на Атлантикот.