Реконструкцијата на владата во Северна Македонија ќе биде финализирана следната недела, по седницата на Извршниот комитет на владејачката ВМРО-ДПМНЕ, изјави во петокот премиерот Христијан Мицкоски, додека неофицијални информации укажуваат дека разговорите со коалициските партнери сè уште не се завршени.
Мицкоски рече дека политичките одлуки за реконструкцијата прво треба да бидат потврдени на партиско ниво, по што ќе следи нивна формализација во владината процедура.
„Во вторник ќе ја имаме седницата на Извршниот комитет. Сепак, тоа се политички одлуки кои треба да се донесат на политичко ниво, па дури потоа да ги операционализираме во рамките на Владата“, изјави премиерот.
Претходно се очекуваше реконструкцијата да биде договорена до крајот на оваа недела.
Според неофицијални информации, разговорите меѓу ВМРО-ДПМНЕ и коалицискиот партнер ЗНАМ се уште траат, а една од главните точки на несогласување е Министерството за правда, кое ЗНАМ не сака да го отстапи.
Портпаролот на ЗНАМ, Никола Мемов, изјави дека преговорите продолжуваат и дека сè уште нема конечен договор за ниту едно прашање.
„На маса се сите отворени теми. Нема конечен договор за ниту едно прашање. Разговорите продолжуваат и очекуваме разврска кон средината на следната недела“, рече Мемов.
Меѓу министрите чии имиња се споменуваат како можни дел од реконструкцијата се министерот за здравство Азир Алиу и министерот за култура Зоран Љутков.
Алиу изјави дека секој носител на политичка функција мора да биде подготвен на промени.
„Секој ден кога доаѓам на работа сум свесен дека може да биде последен ден од политички аспект. Ова е институционално, а не лично прашање“, изјави тој.
Министерот за култура Зоран Љутков рече дека преговорите сè уште се во тек.
„Се уште сме во процес на преговори. Се надевам дека до крајот на оваа недела ќе ги имате сите потребни информации“, изјави Љутков.
Копретседателот на коалицијата ВЛЕН, Биљал Касами, претходно изјави дека по реконструкцијата позицијата на коалицијата во Владата ќе биде посилна отколку досега и дека ВЛЕН очекува да раководи со шест министерства, меѓу кои и Министерството за култура.
Доколку бројот на сменети министри надмине една третина од составот на кабинетот, реконструкцијата ќе мора да биде изгласана во парламентот како избор на нова влада.