Градоначалникот на Општина Брвеница, Јовица Илиевски, почина денеска на 58-годишна возраст, соопштија локални медиуми и претставници на власта.
Илиевски беше градоначалник на Брвеница во два последователни мандати. Првпат беше избран на локалните избори во 2021 година, а довербата од граѓаните ја обнови и на последните локални избори.
Причините за смртта засега не се официјално соопштени.
Веста предизвика бројни реакции од политичари, соработници и граѓани. Премиерот Христијан Мицкоски изрази сочувство до семејството, оценувајќи дека Илиевски ќе остане запаметен како „чесен човек и голем борец за граѓаните“.
Градоначалникот на Скопје, Орце Ѓорѓиевски, исто така се прости од Илиевски, наведувајќи дека неговото заминување претставува голема загуба за локалната самоуправа и за сите што го познавале.
Општина Брвеница соопшти дека погребот ќе се одржи на 24 јуни во 13 часот на гробиштата во селото Челопек. Претходно, од 11 до 13 часот, во црквата „Света Богородица“ ќе се одржи опело.
Илиевски важеше за една од препознатливите политички личности во Полошкиот регион и беше активен во локалната политика повеќе години.