Албанскиот премиер Еди Рама остро ги критикуваше демонстрантите кои веќе седум дена протестираат против проектот во Звернец, оценувајќи дека меѓу нив има „делиранти“, инфлуенсери и луѓе кои живеат од социјалните мрежи, додека предупреди дека протестите би можеле да предизвикаат штета врз туристичката сезона.
Говорејќи во својот подкаст „Фласим“, Рама изјави дека проектот ќе биде реализиран без оглед на противењата, оценувајќи го како инвестиција од стратешко значење за Албанија.
„Проектот ќе се реализира. Тоа е големо добро за нашата економија, голем благослов за Валона и историски исчекор за туристичка и европска Албанија“, рече Рама.
Тој тврдеше дека дел од противниците на проектот имаат различни мотиви, почнувајќи од геополитички и економски интереси, па сѐ до желба за поголема видливост на социјалните мрежи. Според него, инвеститорите се двајца познати катарски бизнисмени и немаат никаква поврзаност со Израел, како што тврдат некои критичари.
Осврнувајќи се на протестите, Рама рече дека меѓу учесниците има луѓе кои искрено се загрижени, но и лица кои, според него, се обидуваат да привлечат внимание преку интернет платформите.
Тој предупреди дека веќе се појавиле првите сигнали за откажување туристички резервации во Саранда и други туристички центри на југот од земјата.
„Доколку се создаде впечаток дека цела Албанија е во превирања, можеме да изгубиме значителен број туристи ова лето, а тоа директно ќе ги погоди малите бизниси и семејствата кои живеат од туризмот“, рече албанскиот премиер.
Во изминатата недела илјадници граѓани протестираа во Тирана и во областа на Звернец против најавениот проект, изразувајќи загриженост за можните последици врз животната средина и заштитените природни подрачја. Владата, пак, тврди дека инвестицијата ќе донесе нови работни места и значителен економски развој за регионот.