ВЛЕН е подготвен за предвремени парламентарни избори доколку се појави нов политички моментум, но во моментов не гледа потреба од нивно одржување, изјави првиот вицепремиер и министер за европски прашања Беким Сали.
Во интервју за „360 степени“, Сали рече дека граѓаните очекуваат реализација на ветените политики и дека барањето избори само заради политички пресметки би било штетно и за политичарите и за државата.
Тој потврди дека во рамки на тековните разговори за реконструкција на Владата се разгледуваат можни кадровски промени и ротација на ресори, при што здравството, европските прашања и ресорот правда се дел од разговорите меѓу коалициските партнери.
Сали најави и дека Владата е блиску до решение за полагањето на правосудниот испит на повеќе јазици, додека практичниот дел би останал на македонски јазик.
Во однос на Законот за правична застапеност, тој оцени дека станува збор за најдоброто решение досега и ги отфрли критиките на ДУИ, обвинувајќи ја партијата дека токму во нејзино време бил напуштен системот на „балансер“.