Цените на горивата во Северна Македонија од полноќ значително се намалуваат, при што дизелот ќе поевтини за седум денари по литар, а бензините за 3,5 до четири денари, одлучи Регулаторната комисија за енергетика.
Според новиот ценовник, Еуродизелот ќе се продава за 80,5 денари за литар, Еуросупер БС-95 за 84 денари, а Еуросупер БС-98 за 86 денари за литар.
Премиерот Христијан Мицкоски оцени дека падот на цените на нафтените деривати, поттикнат од смирувањето на кризата на Блискиот Исток и движењата на светските пазари, треба да се одрази и врз цените на храната.
Тој најави средба со претставници на маркетите и дистрибутерите, предупредувајќи дека Владата ќе интервенира доколку не дојде до намалување на цените на основните прехранбени производи.
„Граѓаните беа толерантни. Сега е ред на компаниите да им возвратат на граѓаните“, изјави Мицкоски, додавајќи дека нема да прифати оправдувања доколку цените останат непроменети.
Владата најави споредби на цените со земјите од регионот и не ја исклучи можноста јавно да ги објави трговците кои нема да ги намалат цените, како и воведување дополнителни мерки за стабилизирање на пазарот.