Двајца британски државјани се наоѓаат во самоизолација во Велика Британија по можна изложеност на хантавирус на крузерот „МВ Хондиус“, каде што три лица починаа за време на епидемија на реткиот вирус, соопшти британската Агенција за здравствена безбедност (UKHSA).
Двајцата патници го напуштиле бродот на островот Света Елена меѓу 22 и 24 април и преку Јоханесбург се вратиле во Британија. Тие немаат симптоми, но сами контактирале со здравствените власти откако слушнале за случаите на бродот.
Британските власти соопштија дека се прават напори за следење на сите лица што биле во близок контакт со нив за време на летовите кон Велика Британија.
Во меѓувреме, 56-годишен британски патник, идентификуван од британските медиуми како поранешен полицаец Мартин Ансти, бил евакуиран од бродот во Холандија во стабилна состојба.
Неговата сопруга Никола изјави за британскиот „Телеграф“ дека последните денови биле „многу драматични“.
„Тој имаше поблаги симптоми, потоа состојбата се влоши, а сега повторно е стабилен. Стравот со овој вирус е што состојбата може многу брзо да се влоши“, изјавила таа.
На бродот сè уште има околу 150 патници и членови на екипажот под строги мерки на претпазливост, соопшти операторот „Oceanwide Expeditions“.
Според Светската здравствена организација, осум лица, меѓу кои и швајцарски државјанин, се сомнителни случаи на инфекција со вирусот.
Тројца патници починаа по појавата на вирусот – холандска брачна двојка и германски државјанин. Дополнително, британски, германски и холандски државјанин беа евакуирани во Холандија за лекување.
Британската агенција за здравствена безбедност соопшти дека сите британски патници ќе бидат вратени дома со чартер-лет, најверојатно од Канарските Острови, доколку не покажуваат симптоми.
По враќањето, тие ќе мора да останат во самоизолација или карантин до шест недели, во зависност од последната можна изложеност на вирусот.
„Ќе побараме сите изложени лица да се самоизолираат и ќе работиме тесно со нив преку редовни тестирања и поддршка“, изјави главниот научен советник на UKHSA, Робин Меј.
Светската здравствена организација соопшти дека ризикот за пошироката јавност останува низок и дека вирусот ретко се пренесува од човек на човек, освен при близок контакт.
Хантавирусот најчесто се пренесува преку глодари и може да предизвика сериозни респираторни и бубрежни компликации. Симптомите вклучуваат треска, силен замор, болки во мускулите, стомачни болки, гадење и повраќање.
Бродот „МВ Хондиус“, кој испловил од Аргентина на 1 април, треба да пристигне во Тенерифе на 9 мај, каде што шпанските власти ќе организираат евакуација и карантин под строги здравствени протоколи.