Бугарскиот историчар и експерт за меѓународни односи Димитар Тјулеков оцени дека државноста на Северна Македонија е изложена на ризик поради, како што рече, враќањето на „македонизмот“ како официјална државна политика, за која тврди дека е поттикнувана од Белград.
Во интервју за Бугарското национално радио, Тјулеков, член на Македонскиот научен институт во Софија, изјави дека Бугарија не треба да одговара на тензиите со конфронтација, туку со политика на европска интеграција и продлабочување на контактите меѓу двете општества.
Неговите коментари доаѓаат по повиците на дел бугарски невладини организации за блокирање на граничните премини со Северна Македонија, акција која во меѓувреме беше откажана.
„И во Бугарија и во Северна Македонија постојат сили кои сакаат да ги блокираат односите меѓу двете држави. Бугарскиот национален интерес е двете земји да се движат во иста насока“, изјави Тјулеков.
Тој оцени дека националистичката реторика не придонесува за подобрување на билатералните односи и повика на засилена јавна дипломатија, културна размена и соработка меѓу образовните и научните институции.
Тјулеков направи разлика меѓу политичкото раководство во Скопје и граѓаните на Северна Македонија, предупредувајќи дека создавањето непријателство меѓу двата народа би им одело во прилог на оние кои се против приближувањето меѓу Софија и Скопје.
„Треба да се бориме против македонизмот, а не да им помагаме на носителите на таа идеологија дополнително да ги оддалечуваат односите меѓу Бугарија и Северна Македонија“, рече тој.
Според Тјулеков, актуелното раководство во Скопје нема вистинска желба за членство во Европската унија, тврдење кое не беше поткрепено со конкретни докази.
Тој повика на надградување на постигнатото во билатералните односи во изминатите три децении и на продолжување на процесот на европска интеграција на регионот.