Капетановиќ и Герапетритис: Регионалната соработка е клучна за европската иднина на Западен Балкан
Генералниот секретар на Советот за регионална соработка (RCC), Амер Капетановиќ, и грчкиот министер за надворешни работи, Јоргос Герапетритис, оценија дека регионалната соработка останува суштински предуслов за европската интеграција на Западен Балкан и поширокиот регион на Југоисточна Европа.
На средба во седиштето на RCC во Сараево, двајцата функционери разговараа за европската перспектива на регионот, улогата на Процесот за соработка во Југоисточна Европа (ПСЈИЕ), како и за спроведувањето на Стратегијата 2030 за Југоисточна Европа.
Разговорите се надоврзаа на неодамнешниот самит на ПСЈИЕ во Софија, каде лидерите го поддржаа Годишниот извештај на RCC и Среднорочната ревизија на Стратегијата 2030, со фокус на претворање на политичките заложби во конкретни проекти и мерливи резултати.
Посебно внимание било посветено и на претстојното грчко претседателство со Советот на Европската унија во втората половина на 2027 година, како и на можностите за обновување на таканаречениот „солунски моментум“ за проширување на ЕУ кон Западен Балкан.
„Преку ПСЈИЕ, Стратегијата 2030 и регионалните програми на RCC градиме поповрзана, поотпорна и поконкурентна Југоисточна Европа, цврсто втемелена во нашата заедничка европска иднина“, изјави Капетановиќ.
Герапетритис ја повтори поддршката на Грција за европската перспектива на Западен Балкан и ја нагласи важноста на ПСЈИЕ како најсеопфатна рамка за политичка соработка во регионот.
Тој ја пофали улогата на RCC во поттикнувањето на дијалогот и спроведувањето на заедничките регионални приоритети во области како економскиот развој, поврзаноста и институционалната соработка.
Капетановиќ ѝ се заблагодари на Грција за континуираната политичка и институционална поддршка на RCC, нагласувајќи дека активното учество на земјите членки останува клучно за справување со новите предизвици и обезбедување конкретни придобивки за граѓаните и бизнисите во регионот.
Средбата се одржа во Зградата на пријателството меѓу Грција и Босна и Херцеговина во Сараево, реконструирана по војната со финансиска поддршка од грчката влада и отворена во 2007 година како симбол на регионалната солидарност и соработка.