Американскиот претседател Доналд Трамп ја продолжи националната вонредна состојба поврзана со Западен Балкан, оценувајќи дека и натаму постојат закани за националната безбедност и надворешната политика на Соединетите Американски Држави.
Одлуката, објавена во Федералниот регистар, ги продолжува санкциските механизми насочени кон лица и организации обвинети за поткопување на мирот, безбедноста и демократските процеси во регионот.
Во документот повторно се наведуваат мировните договори и рамки кои Вашингтон ги смета за клучни за регионалната стабилност, меѓу нив и Охридскиот рамковен договор од 2001 година во Северна Македонија, кој беше вклучен во американскиот санкциски режим преку дополнувањата на извршната наредба од 2003 година.
Според Белата куќа, активностите на поединци и групи кои поддржуваат екстремистичко насилство или го попречуваат спроведувањето на мировните договори во Босна и Херцеговина, Косово и Северна Македонија и понатаму претставуваат причина за задржување на вонредните мерки.
Одлуката претставува продолжување на американската политика кон Западен Балкан, воспоставена пред повеќе од две децении, со цел поддршка на мирот, безбедноста и регионалната стабилност.
Продолжувањето на вонредната состојба не воведува нови санкции, туку ја задржува правната рамка што му овозможува на Вашингтон да презема мерки против лица и организации кои се сметаат за закана за спроведувањето на мировните договори во регионот.