Администрацијата на американскиот претседател Доналд Трамп ги игнорирала препораките на службениците од Бирото за индустрија и безбедност (BIS) при Министерството за трговија кога одлучила да ги олесни ограничувањата за извоз на напредни полупроводници и друга чувствителна технологија во Обединетите Арапски Емирати (ОАЕ), објави „Политико“, повикувајќи се на повеќе поранешни функционери и извори запознаени со интерните документи.
Според извештајот, службениците минатата година подготвиле повеќе анализи и меморандуми во кои предупредиле дека проширувањето на пристапот на државната компанија за вештачка интелигенција G42 и нејзините поврзани компании до американска технологија може да го зголеми ризикот чувствителни технологии да завршат во Кина.
Во документите, меѓу другото, биле наведени загрижености поради претходните врски на G42 со кинески компании, користењето опрема на Huawei и можноста за неовластен пристап до чувствителни системи.
И покрај тие предупредувања, Министерството за трговија на 10 јули објави дека ги олеснува правилата за извоз кон ОАЕ, со што на одобрени емиратски компании им овозможува полесен пристап до напредни чипови, воена технологија, сателитски компоненти и опрема за цивилни нуклеарни програми.
Бирото за индустрија и безбедност соопшти дека политиката има за цел САД да останат „глобален партнер по избор за инвестиции во критични технологии“, додавајќи дека администрацијата ја користи дипломатијата и регулаторните реформи за да ја зачува американската технолошка доминација.
Белата куќа оцени дека новите правила ја одразуваат „посветеноста на ОАЕ кон американската безбедност и технолошкиот екосистем“.
Компанијата G42 соопшти дека во последните години вовела дополнителни механизми за безбедност, усогласеност и спречување на пренасочување на чувствителната технологија, во координација со американските власти и технолошките партнери.
Одлуката предизвика критики од безбедносни експерти и дел од американските законодавци, кои предупредуваат дека постојат ризици најсовремената американска технологија да биде пренасочена кон Кина. Демократската сенаторка Елизабет Ворен побара раководството на Министерството за трговија да сведочи пред Конгресот, оценувајќи дека потегот отвора сериозни прашања за националната безбедност.