По 24 години од формирањето на Демократската унија за интеграција (ДУИ), во кабинетот на претседателот на партијата Али Ахмети за првпат е поставено државното знаме на Северна Македонија, пишува порталот на албански јазик ТС.
Знамето беше забележано за време на средбата на Ахмети со амбасадорот на Австрија во Северна Македонија, Мартин Памер.
Во изјава за порталот ТС, Ахмети рече дека отсекогаш бил поддржувач на концептот на унитарна држава и дека поставувањето на државното знаме никогаш не било спорно за него.
„Отсекогаш сум бил за унитарна држава. Тоа беше и сугестија од странските амбасадори во земјата, кои на средбите ми предлагаа во мојот кабинет да биде поставено знамето на државата Северна Македонија“, изјави Ахмети.
Тој додаде дека државата им припаѓа на сите нејзини граѓани и дека државните симболи треба да се почитуваат.
Поставувањето на државното знаме во кабинетот на лидерот на ДУИ претставува симболичен потег и, според Ахмети, испраќа порака за соживот, меѓусебна почит и еднаквост на сите заедници во Северна Македонија.