Германија подготвува најголемо задолжување во последните децении, откако владата го претстави нацрт-буџетот за 2027 година со кој значително ги зголемува трошоците за одбрана, додека повеќето други ресори ќе се соочат со кратења.
Министерот за финансии Ларс Клингбајл предложи федералниот буџет за 2027 година да изнесува 555,4 милијарди евра, од кои речиси 110 милијарди евра се наменети за одбраната – околу една третина повеќе отколку годинава.
Поради тоа што расходите далеку ги надминуваат буџетските приходи, владата планира ново задолжување од речиси 119 милијарди евра, додека вкупниот нов долг, заедно со специјалните фондови надвор од редовниот буџет, би можел да достигне околу 203 милијарди евра во 2027 година.
Германија истовремено располага со два големи специјални фонда финансирани преку задолжување. Едниот, вреден 500 милијарди евра, е наменет за инфраструктура и климатска трансформација во следните 12 години, додека вториот е резервиран за модернизација на вооружените сили.
Берлин планира одбранбените трошоци постепено да достигнат 3,5 проценти од бруто-домашниот производ до 2029 година, а до 2035 година да се искачат на пет проценти, во согласност со новите цели на НАТО.
Клингбајл ја оправда политиката на задолжување со безбедносната состојба во Европа.
„Не можеме да се браниме од Владимир Путин со избалансиран буџет“, рече тој, додавајќи дека трите децении недоволно инвестирање во германската армија не можат да се надоместат без нов долг.
Иако германскиот Устав предвидува строги ограничувања за задолжувањето преку таканаречената „должничка сопирачка“, трошоците за одбрана и безбедност во голема мера се изземени од тие правила.
Според владините проекции, јавниот долг ќе достигне околу 69,5 проценти од БДП во 2027 година, над европската референтна граница од 60 проценти, но сепак под просекот на еврозоната.
Истовремено, германската економија продолжува да стагнира. Владата ја обвини војната меѓу САД и Иран дека дополнително го забавила очекуваното закрепнување на економијата.
За да обезбеди дополнителни приходи, Берлин планира воведување данок на пластика, данок на шеќер, повисоки акцизи за тутун и алкохол, како и дополнително оданочување на најбогатите граѓани.
Сепак, владата признава дека тоа нема да биде доволно за покривање на растечките расходи.
Министерствата, освен Министерството за одбрана, веќе се соочуваат со задолжителни намалувања на буџетите. Развојната помош ќе биде намалена за уште 500 милиони евра, на вкупно 9,5 милијарди евра, додека федералните субвенции за пензискиот и здравствениот систем исто така ќе бидат ограничени.
Германската конфедерација на синдикати оцени дека новиот буџет создава „голем дисбаланс“, предупредувајќи дека социјалните програми се кратат за да се финансира забрзаното вооружување.
Предлог-буџетот ќе биде разгледуван во Бундестагот по летната пауза, а неговото конечно усвојување е планирано за крајот на ноември.