Сообраќајот на патиштата надвор од градските средини е засилен поради зголемениот број граѓани кои патуваат кон летните туристички дестинации, соопшти Автомото сојузот на Македонија.
Најголема фреквенција на возила е регистрирана на граничниот премин „Богородица“, каде има задржувања за излез од државата.
На другите гранични премини, од македонска страна, засега нема подолги чекања ниту за влез ниту за излез од земјата, информира АМСМ.
Од Сојузот ги повикаа возачите да ја следат состојбата на патиштата, да ја приспособат брзината на условите во сообраќајот и да ги почитуваат сообраќајните правила.
Зголемената фреквенција на возила е вообичаена за овој период од годината, кога голем број патници се упатуваат кон туристичките центри во Грција и другите летни дестинации.