Северна Македонија продолжува да бара „праведливо и одржливо“ решение со Бугарија за деблокирање на евроинтегративниот процес, изјави министерот за надворешни работи и надворешна трговија Тимчо Муцунски, додавајќи дека разговорите со Софија, земјите членки и институциите на Европската Унија се одвиваат континуирано, но без јавно откривање на деталите.
„Доколку поединечните разговори ги водиме пред јавноста, тоа не би нѐ довело никаде. Ние немаме друга алтернатива освен да бараме решение“, рече Муцунски.
Тој нагласи дека Владата во изминатите две години не престанала да работи на изнаоѓање решение и дека секој можен договор ќе биде во рамките на принципите што јавно ги поставила.
„Не сме престанале да работиме на изнаоѓање праведливо и одржливо решение“, изјави министерот.
Муцунски оцени дека постои позитивен импулс во разговорите, но дека засега нема договор што може да биде презентиран пред јавноста.
Според него, деблокирањето на пристапниот процес останува стратешки интерес не само за Северна Македонија, туку и за регионот и Европската Унија.
Министерот ги поддржа и ставовите на претседателката Гордана Сиљановска-Давкова, која неодамна предупреди дека уставните измени сами по себе не се гаранција дека нема да се појават нови блокади, оценувајќи дека проблемот лежи и во Протоколот 2.
„Немало момент во последните две години кога за ова прашање не сме разговарале со земјите членки на ЕУ, европските институции и со Бугарија. Разговорите ќе продолжат, но немаме намера да правиме отстапки поврзани со националниот интерес, историјата и идентитетот“, рече Муцунски.
Тој додаде дека, според неговото правно толкување, протоколите не се составен дел од Преговарачката рамка.
Осврнувајќи се на дебатите во Брисел, Муцунски рече дека во последните месеци има „хиперпродукција“ на неформални документи за иднината на политиката на проширување на ЕУ, оценувајќи дека сегашниот модел, создаден пред 15 до 20 години, повеќе не одговара на новите геополитички околности по руската инвазија врз Украина.
Во делот на човековите права, министерот истакна дека Северна Македонија продолжува да ги отвора прашањата за положбата на Македонците во Бугарија во Советот на Европа и активно инсистира на спроведување на пресудите на Европскиот суд за човекови права, вклучително и предметите поврзани со ОМО „Илинден-Пирин“.
Во однос на безбедносната состојба, по заканите што Иран ги упати кон Бугарија, Муцунски изјави дека според информациите од Агенцијата за разузнавање и Агенцијата за национална безбедност, нема конкретни сознанија за безбедносна закана кон Северна Македонија.