Цените на горивата и мазивата за личен превоз во Европската Унија во јули биле за 16,9% повисоки отколку во истиот месец минатата година, покажуваат најновите податоци на Евростат, што укажува на продолжен притисок врз трошоците за транспорт на европските домаќинства.
Годишниот раст во јули следува по уште посилното поскапување од 20,7% во мај и 13,7% во јуни.
Во 25 од 27 земји-членки на ЕУ, горивата и мазивата во јули биле поскапи отколку една година претходно.
Најголемо годишно зголемување е забележано во Романија, од 24,2%, додека во Германија и Литванија цените пораснале за по 22,9%.
Следуваат Бугарија со раст од 22,2%, Холандија со 22% и Финска со 20,5%.
Унгарија е единствената земја во која Евростат регистрирал мало намалување од 0,1%, додека меѓу најниските годишни зголемувања биле оние во Шведска од 1,2% и Ирска од 3,2%.
Бензинот и дизелот повторно поскапеа во јули
По падот на цените во јуни, горивата повторно поскапеле во јули.
Во просек на ниво на ЕУ, дизелот поскапел за 4,3% во однос на јуни, додека бензинот бил поскап за 4,7%.
Само еден месец претходно трендот бил обратен. Во јуни, во споредба со мај, дизелот поевтинил за 6,4%, а бензинот за 4,2%.
Тоа укажува на голема нестабилност на европскиот пазар на горива, каде цените во период од неколку недели се движат во спротивни насоки.
Кај дизелот, раст на цените во јули е забележан во 17 земји-членки.
Најголемо месечно поскапување било во Полска – 13,4%, потоа во Германија – 12,7% и Грција – 12,1%.
Во девет земји дизелот поевтинил. Најголем пад е регистриран во Кипар од 7,9%, Шведска од 7,4% и Ирска од 6,4%.
Бензинот во Полска поскапел за 17,2% за само еден месец
Кај бензинот разликите меѓу земјите се уште поголеми.
Во 14 земји цената во јули пораснала во однос на јуни, додека во 12 е забележано намалување.
Најсилно месечно поскапување на бензинот имало во Полска – дури 17,2%.
Во Германија растот изнесувал 11%, а во Шпанија 7,1%.
На спротивната страна, бензинот во Шведска поевтинил за 11,1%, во Кипар за 5,4%, а во Ирска за 4,1%.
Цените во Малта останале непроменети бидејќи, според Евростат, цените на горивата таму се фиксирани од 2020 година.
Горивата повторно фактор за инфлацијата
Растот на цените на бензинот и дизелот е значаен и поради поширокото влијание врз инфлацијата.
Поскапите горива директно ги зголемуваат трошоците за граѓаните, но влијаат и врз транспортот на стоки, логистиката и деловните трошоци, што може индиректно да се пренесе и врз цените на храната и другите производи.
Податоците на Евростат се базираат на Хармонизираниот индекс на потрошувачки цени, кој се користи како главна споредлива мерка за инфлацијата во Европската Унија.