Алгоритмите повеќе не се само технолошка алатка – тие влијаат врз продукцијата на културата, секојдневните социјални интеракции, ширењето информации и човековите предрасуди, но и врз медиумскиот простор, јавниот дискурс и степенот на демократичност во општествата.
Ова беа дел од темите на четвртата сесија од серијата тренинзи посветени на вештачката интелигенција, одржана заедно со професори од Правниот факултет „Јустинијан Први“ во Скопје.
Сесијата беше фокусирана на значењето и влијанието на алгоритмите во контекст на комуникациите и медиумите, особено во услови кога сè поголем дел од информациите што стигнуваат до граѓаните се филтрираат, рангираат или препорачуваат преку автоматизирани системи.
Кој одлучува што гледаме?
Алгоритмите имаат сè поголемо влијание врз тоа кои информации добиваат видливост во дигиталниот простор, како се дистрибуираат медиумските содржини и на кој начин граѓаните комуницираат со нив.
Нивната примена истовремено отвора прашања за можноста постојните предрасуди да бидат репродуцирани или засилени преку автоматизирани системи, како и за влијанието што тие го имаат врз плурализмот и јавната дебата.
Разбирањето на начинот на кој функционираат алгоритмите поради тоа станува важно не само за технолошките експерти, туку и за новинарите, правниците и другите професионалци кои учествуваат во обликувањето на јавниот простор.
Етичка употреба на ВИ во фокусот
Сесијата се одржа во рамките на проектот „Зајакнување на етичката употреба на генеративните алатки за вештачка интелигенција и медиумското известување за ВИ преку новинарското образование во Северна Македонија“.
Проектот е поддржан од УНЕСКО преку Меѓународната програма за развој на комуникациите и е насочен кон подобро разбирање на можностите, ризиците и етичките предизвици што ги носи примената на ВИ во медиумите и новинарството.
Овој текст е подготвен во рамките на проектот „Зајакнување на етичката употреба на генеративни алатки за вештачка интелигенција и медиумското покривање на вештачката интелигенција преку образованието по новинарство во Северна Македонија“, финансиран од Меѓународната програма за развој на комуникациите (IPDC) на УНЕСКО. Изразените ставови и мислења се исклучиво на авторот/авторите и не мора да ги одразуваат ставовите на УНЕСКО како донатор.