ДУИ обвини дека ресурсите за изградба на автопатските делници од договорот со „Бехтел и Енка“ се пренасочуваат кон Коридорот 10Д на сметка на Коридорот 8, тврдејќи дека целта е делницата Прилеп–Битола да биде завршена пред следните избори. ВЛЕН ги отфрли обвинувањата како неосновани и соопшти дека работите на Коридорот 8 активно се одвиваат.
ДУИ, повикувајќи се на информации со кои располага, тврди дека на терен се работи во сооднос од речиси „четири спрема еден“ во корист на Коридорот 10Д и дека механизацијата, работната сила и динамиката на реализација се пренасочени на штета на Коридорот 8.
„Двата сегмента се дел од истиот проект што ние го обезбедивме со ‘Бехтел и Енка’. Денес Владата во практика го менува приоритетот на проектот“, соопшти ДУИ.
Партијата тврди дека причината е политичка наредба Коридорот 10Д, од Прилеп до Битола, да биде завршен до следните избори напролет, за власта да може да го претстави како свој изборен резултат.
ДУИ не приложи документи или други докази за тврдењето за соодносот „четири спрема еден“.
Партијата го поврза прашањето и со стратешкото значење на Коридорот 8, кој претставува транспортна врска исток–запад и е дел од инфраструктурата значајна за мобилноста на НАТО во регионот.
„Дали имаме само изборна злоупотреба на проект вреден милијарди евра или некој намерно го забавува стратешкиот коридор на НАТО? Кој има корист од слабеењето на Коридорот 8?“, праша ДУИ.
Партијата побара Владата да објави колку работници, механизација и финансиски средства во моментов се ангажирани на Коридорот 10Д, а колку на Коридорот 8, како и кој донел одлука за распределбата на ресурсите.
ВЛЕН ги отфрли обвинувањата и побара ДУИ да објави документ со кој ќе го поткрепи тврдењето за соодносот „четири спрема еден“.
„Во Коридорот 8 активно се работи. На делницата Гостивар–Букојчани работите се одвиваат на 17 од вкупно 31 километар, додека активностите продолжуваат и на Тетово–Гостивар и на другите сегменти“, соопшти ВЛЕН.
Коалицијата оцени дека Коридорот 8 останува стратешки проект и дека ќе биде реализиран, обвинувајќи ја ДУИ дека со своите тврдења се обидува да создаде политичка тема без да понуди докази.