Советот за регионална соработка (РСС) одбележа десет години поддршка на младите филмски таленти на Сараевскиот филмски фестивал, каде годинашното „Срце на Сараево“ за најдобар студентски филм го освои Река Пинцес (Réka Pinczés) за филмот „Unwellness“.
Наградата беше врачена на церемонијата со која беше затворено 32. издание на Сараевскиот филмски фестивал (SFF), соопшти РСС.
Од организацијата велат дека наградата им овозможува на новите автори од Југоисточна Европа да добијат поголема видливост и своите дела да ги претстават пред поширока публика.
„Признанието што младите филмски автори од Југоисточна Европа го добиваат на најголемиот филмски фестивал во регионот нè потсетува на талентот, креативноста и потенцијалот што нашиот регион може да ги понуди“, соопшти РСС, честитајќи ѝ на Пинцес.
Десет години „Срце на Сараево“
РСС веќе една деценија ја спонзорира наградата „Срце на Сараево“ за најдобар студентски филм, со цел да ги поддржи младите автори и да ја зголеми видливоста на нивните дела.
Меѓу претходните добитници се Адем Тутиќ за „Tarik“ во 2025 година, Надја Петровиќ за „The Smell of Fresh Paint“ во 2024, Ана Ѓимеши за „Falling“ во 2023, Клара Соваговиќ и Јосип Лукиќ за „It’s Not Cold for Mosquitoes“ во 2022 и Александру Миронеску за „Summer Planning“ во 2021 година.
Наградата претходно ја добија и Зејнеп Дилан Сурен за „The Great Istanbul Depression“, Никола Стојановиќ за „Sherbet“, Хајни Киш за „Last Call“ и Невен Самарџиќ за „Clean“.
Според РСС, уметноста и културата имаат поширока улога од самото културно творештво, бидејќи можат да ги поврзуваат луѓето, да ја поттикнуваат регионалната соработка и да создаваат нови економски и професионални можности.
Младите автори како дел од регионалното поврзување
Поддршката за студентските филмови е дел од пошироките активности на РСС насочени кон создавање можности младите од регионот да соработуваат, да развиваат идеи и да учествуваат во обликувањето на својата иднина.
Во рамките на годинашниот Сараевски филмски фестивал, проектот „Лабораторија за млади од Западен Балкан“, финансиран од Европската Унија и спроведуван од РСС, заедно со фестивалот ја организираше Втората регионална конференција за младинска културна соработка.
На конференцијата учествуваа млади филмски автори и студенти од шесте економии на Западен Балкан, кои добија можност за размена на искуства, професионално вмрежување и воспоставување регионални контакти.
РСС наведува дека преку Лабораторијата за млади, изборот на жени претприемачки на годината од Западен Балкан, Балкатон и наградата за иновации „Пеперутка“, настојува идеите и креативноста на младите да ги претвори во конкретни можности со регионално влијание.
Активноста за поддршка на наградата е финансирана од Германија, која е учесник во РСС.