Претседателката Гордана Сиљановска-Давкова, претседателот на Собранието Африм Гаши и ВМРО-ДПМНЕ упатија честитки до православните верници по повод Успението на Пресвета Богородица – Голема Богородица, истакнувајќи ги верата, солидарноста, семејството и соживотот.
Сиљановска-Давкова упати честитка до поглаварот на Македонската православна црква – Охридска архиепископија, архиепископот охридски и македонски и на Јустинијана Прва, г.г. Стефан, до членовите на Светиот архијерејски синод, свештенството, монаштвото и до православните верници.
Претседателката рече дека празникот потсетува на духовната сила, пожртвуваноста, истрајноста и мајчинската љубов на Пресвета Богородица.
„Во време обременето со искушенија и премрежија, верувам дека ликот на Мајката Божја нѐ инспирира и храбри сите нас да истраеме на патот на доброто, градењето на заедништвото, грижата и солидарноста во заедницата, чувајќи и негувајќи го мирот во неа“, порача Сиљановска-Давкова.
Таа посака храмовите на Македонската православна црква – Охридска архиепископија, во земјата и во дијаспората, да бидат исполнети со верници сплотени во христијанската љубов.
Претседателот на Собранието Африм Гаши, исто така, им го честиташе празникот на православните верници и на граѓаните кои го одбележуваат.
Тој посака празничниот ден да биде исполнет со мир, спокој и семејна топлина, повикувајќи во духот на соживотот да се гради заедничко општество.
ВМРО-ДПМНЕ во својата честитка порача дека Успението на Пресвета Богородица ги симболизира верата, надежта, љубовта и семејството, истакнувајќи ја Мајката Божја како симбол на мајчинството, пожртвуваноста и духовната сила.
Со празнична честитка се огласи и Македонското друштво „Илинден“ од Тирана.
Успението на Пресвета Богородица, меѓу верниците познато како Голема Богородица, е еден од најзначајните празници посветени на Богородица и се одбележува на 28 август според календарот што го следи Македонската православна црква – Охридска архиепископија.