Полицијата идентификувала тројца осомничени за физичкиот напад врз две лица во Гостивар, откако видеоснимка од инцидентот била објавена на социјалните мрежи, соопшти Министерството за внатрешни работи.
Според полицијата, 22-годишниот А.В. од Гостивар на 2 август во 22:20 часот пријавил дека истиот ден, околу 2:30 часот, тој и неговиот пријател Л.Е. биле нападнати на улицата „Борче Јованоски“.
Во пријавата било наведено дека тројца непознати мажи ги нападнале со тврди предмети и дрвени палки.
За случајот бил известен дежурен јавен обвинител, по чии насоки полициски службеници од ОВР Гостивар презеле мерки и ги идентификувале тројцата учесници во нападот.
Двајца од осомничените се малолетници од Гостивар. Тие биле повикани на службен разговор во полициска станица, а по наредба на јавен обвинител им биле одземени патните исправи.
Како трет осомничен е идентификуван 20-годишниот В.Д. од Скопје. До СВР Скопје била испратена телеграма за негово пронаоѓање и понатамошно постапување.
Од МВР најавија дека, по целосното документирање на случајот, против осомничените ќе биде поднесена соодветна пријава и тие по брза постапка ќе бидат изведени пред судија на претходна постапка.