ДУИ го обвини ВЛЕН дека континуирано го штити вицепремиерот Иван Стоилковиќ и дека молчи за неговите постапки и изјави, поставувајќи го прашањето „каков долг му должи ВЛЕН на Стоилковиќ“.
Во соопштението, ДУИ наведува повеќе случаи за кои тврди дека ВЛЕН не реагирал, меѓу кои употребата на терминот „Косово и Метохија“ од страна на Стоилковиќ, присуството на српски војници и полицајци во Северна Македонија, како и изјави на српски министри кои партијата ги оценува како спорни за државниот суверенитет и достоинство.
ДУИ го критикува ВЛЕН и поради односот на Владата кон Милорад Додик, наведувајќи дека тој бил пречекан со државни почести, додека албанскиот партнер во владејачката коалиција не реагирал на неговите ставови кои партијата ги оценува како антизападни и проруски.
Опозициската партија го отвора и прашањето за растечкото присуство на српски капитал во земјата.
Како пример ја посочува АЛТА Банка и тврди дека ВЛЕН конкретно помогнал таа да стане дел од банкарскиот сектор во Северна Македонија.
ДУИ наведува и дека во земјата веќе работи српски медиум, оценувајќи дека економското и медиумското присуство на Србија се зголемуваат.
Партијата, сепак, во соопштението не приложува докази дека овие деловни активности се дел од координирана политичка операција или влијание.
ДУИ се повикува и на претходна изјава на Стоилковиќ, според која тој два или три пати ги „спасил“ претставниците на ВЛЕН од јавен срам.
Според ДУИ, по оваа изјава немало ниту спротивставување, ниту дистанцирање од ВЛЕН.
„Никакво противење. Никакво дистанцирање. Никаква реакција“, се наведува во соопштението.
ДУИ тврди дека ваквиот однос покажува политичка зависност на ВЛЕН од Стоилковиќ.
Партијата повторно го отвори и прашањето за петмината албански административци кои, според ДУИ, биле отпуштени од работа, тврдејќи дека ВЛЕН ниту тогаш не го спречил Стоилковиќ.
Како најнов пример го наведува случајот со српски функционер во Агенцијата за остварување на правата на заедниците, за кој ДУИ тврди дека исто така добива политичка заштита од ВЛЕН.
„Што му должи ВЛЕН на Стоилковиќ, па секогаш го поддржува и го брани?“, прашува ДУИ.
Партијата го обвинува ВЛЕН дека наместо да ги застапува интересите на албанските граѓани и државните интереси на Северна Македонија, станал политички зависен од Стоилковиќ и од интересите кои, според ДУИ, тој ги претставува.
ВЛЕН претходно ги отфрлаше нападите од ДУИ како политички манипулации и ја обвинуваше партијата дека по повеќе од две децении во власта се обидува повторно да се позиционира како заштитник на интересите на Албанците.