Соединетите Американски Држави најавија нова, екстремно строга рунда санкции против Иран, додека Техеран возврати со закана дека може да го запре извозот на нафта од Персискиот Залив доколку продолжи американската „економска војна“.
Американскиот министер за финансии Скот Бесент рече дека Вашингтон има намера да ја „пресече секоја економска линија за спас“ што му овозможува на Иран да ја одржува економијата и воените капацитети.
Бесент најави „економски Д-Ден“ за Техеран и, според објавените најави, новиот пакет треба да претставува една од најагресивните финансиски офанзиви што САД ги презеле против една држава.
Одговорот од Техеран беше непосреден.
Иранскиот безбедносен функционер Мохсен Резаи предупреди дека, доколку претседателот Доналд Трамп продолжи со економскиот притисок, Иран ќе го запре извозот на нафта од Заливот и поддршката на која било држава за американските санкции ќе ја третира како „акт на војна“.
ХОРМУЗ ПОВТОРНО ВО ЦЕНТАРОТ НА КРИЗАТА
Заканата од Техеран дополнително го зголемува притисокот врз Ормутскиот Теснец, една од најважните рути за глобалната трговија со енергенси.
Според податоците на компанијата за следење бродови Kpler, помалку од 20 пловила минале низ теснецот во текот на викендот – 13 во саботата и само четири во неделата.
Секое посериозно нарушување на пловидбата низ Ормутскиот Теснец може да има директни последици врз светските цени на нафтата и гасот и врз економиите зависни од увоз на енергенси.
Иранскиот министер за надворешни работи Абас Арагчи ги отфрли најавените американски санкции, велејќи дека Техеран веќе го видел „истиот филм многупати“ и дека политиката на притисок на администрацијата на Трамп не е суштински различна од онаа на претходните американски влади.
ВОЈНАТА ВЕЌЕ ВЛИЈАЕ ВРЗ АМЕРИКАНСКИТЕ ВОЕНИ ОБВРСКИ
Конфликтот со Иран почнува да има последици и врз американското воено присуство во други региони.
САД откажаа голема заедничка амфибиска воена вежба со Јужна Кореја, планирана за следниот месец, поради ограничена расположливост на американски сили поврзана со војната со Иран.
Јужнокорејските власти соопштија дека американските маринци уште во јуни ги известиле дека нема да има доволно расположливи сили за вежбата „Ssangyong“.
Откажувањето доаѓа откако Трамп претходно нареди и намалување на обемот на друга годишна американско-јужнокорејска вежба.
ИРАК ПРЕДЛАГА БЕЗБЕДНОСЕН СОВЕТ СО ИРАН И САУДИСКА АРАБИЈА
Во обид да се намалат регионалните тензии, Ирак предложи формирање заеднички безбедносен координациски совет со Иран и Саудиска Арабија.
Ирачкиот советник за национална безбедност Касим ал-Араџи рече дека иницијативата треба да помогне во надминување на „кризата на доверба“ меѓу Техеран и Ријад.
Предлогот следува по саудиските тврдења од јули дека биле уништени беспилотни летала лансирани од Ирак кон нафтени објекти, за кои Ријад ги обвини групите поврзани со Иран.
ГРЦИЈА ЈА ЗАСИЛУВА ПРОТИВВОЗДУШНАТА ОДБРАНА
Тензиите се прелеваат и кон Европа.
Грција префрла ракетна батерија „Патриот“ од островот Карпатос кон поморската база Суда на Крит, според грчки медиуми, по предупредувањата од ирански функционери дека американските бази на европска територија би можеле да станат цели.
Суда е една од стратешки најважните воени точки во источниот Медитеран и ја користат и американските сили.
Најновите американски најави за санкции и иранските закани покажуваат дека конфликтот сè повеќе се префрла од бојното поле кон енергетиката, финансискиот систем и глобалната трговија.
Доколку Техеран навистина се обиде да го ограничи извозот на нафта од Заливот, последиците би можеле брзо да се почувствуваат далеку надвор од Блискиот Исток.