Премиерот Христијан Мицкоски изјави дека растот на трошоците за камати на јавниот долг од 120 милиони евра во 2017 година на околу 350 милиони евра во 2026 година е последица на задолжувањата на претходната влада предводена од СДСМ и ДУИ.
Мицкоски се повика на неодамнешно интервју на економистот Бранимир Јовановиќ, поранешен советник во Министерството за финансии во периодот кога министер беше Драган Тевдовски.
Според премиерот, податоците што ги навел Јовановиќ претставуваат признание дека сегашната влада плаќа значително повисоки камати поради долговите наследени од претходната власт.
„Кога дојдовме ние во Министерството за финансии со тогашниот министер Тевдовски, каматите кои ги плаќавме на долгот беа 120 милиони евра, а во 2026 година каматите кои оваа влада ги плаќа се 350 милиони евра“, го пренесе Мицкоски делот од изјавата на Јовановиќ.
Мицкоски: Три спрема еден
Премиерот оцени дека споредбата покажува оти обврските за камати се зголемиле речиси трипати.
„Тоа е долгот што го оставила тогашната влада на СДСМ и ДУИ и долгот што го плаќа оваа влада која го наследи од владата на СДСМ и ДУИ“, рече Мицкоски.
Сепак, растот на расходите за камати сам по себе не значи дека јавниот долг се зголемил трипати, како што може да се заклучи од изјавата на премиерот. Висината на каматните расходи зависи од повеќе фактори, меѓу кои вкупниот долг, каматните стапки по кои државата се задолжувала, роковите на достасување, рефинансирањето и условите на домашните и меѓународните финансиски пазари.
За прецизна споредба на задолжувањето меѓу двете влади потребно е одделно да се анализираат јавниот долг како процент од БДП, неговиот номинален износ, новите задолжувања и просечната цена на долгот.
Нов напад врз економската политика на СДСМ
Мицкоски ја искористи изјавата и за поширока критика на економските политики на претходната влада.
Тој ги посочи воведувањето на прогресивното оданочување и солидарниот данок како примери за политики за кои смета дека ѝ нанеле штета на економијата.
Премиерот рече дека актуелната влада го враќа солидарниот данок и економската политика на претходната власт ја нарече „марихуана економска политика“.