Цените на фабрички произведените цигари во Германија значително ќе пораснат од почетокот на следната година, откако германскиот парламент даде конечна согласност за реформа на данокот на тутун.
По одобрувањето во Бундестагот, измените ги поддржа и Бундесратот, со што се отвори пат за постепено зголемување на акцизите на цигарите и другите тутунски производи во периодот од 2027 до 2030 година.
Повисоките даноци ќе се пренесат врз потрошувачите, па цените во тој период би можеле да пораснат за околу 50 отсто или повеќе.
Просечната цена на кутија од 20 цигари во Германија во моментов е нешто над осум евра, а до 2030 година би можела да достигне речиси 12 евра, според проценките на Министерството за финансии.
Познатите брендови би можеле да чинат и до 14 евра за кутија.
Владата очекува повеќе приходи и помалку пушачи
Германската влада ја образложи реформата со потребата од фискална консолидација и заштита на здравјето.
Во Германија секоја година околу 130.000 луѓе умираат од болести поврзани со употребата на тутун.
Според податоците од 2025 година, околу 19 отсто од населението пуши – 14 отсто редовно, а пет отсто повремено.
Катрин Шалер од Германскиот центар за истражување на рак ја оцени мерката како чекор во добра насока, но предупреди дека законот не оди доволно далеку бидејќи алтернативните тутунски производи и натаму ќе останат релативно евтини.
Дополнителни 12 милијарди евра во буџетот
Германската влада очекува повисоките даноци да донесат околу 12 милијарди евра дополнителни приходи во буџетот во следните четири години.
Тутунската индустрија, сепак, предупредува дека значителното зголемување на цените може да го поттикне нелегалниот пазар и шверцот со цигари.
Јан Мике од здружението на тутунската индустрија БВТЕ оцени дека фискалните очекувања на владата се нереални и дека мерката може да стане поттик за организираниот криминал.
Реформата во Бундестагот ја поддржа големо мнозинство од владејачката коалиција на конзервативците на канцеларот Фридрих Мерц и Социјалдемократската партија.