Американците имаат најпозитивни чувства кон Австралија, Канада, Јапонија и Италија, додека Русија е убедливо најнегативно оценета меѓу земјите од Г20, покажува новото истражување на „Пју рисрч центар“.
Истражувањето, објавено во пресрет на самитот на Г20 што САД ќе го организираат во декември, ги мери ставовите на Американците кон 18 земји членки на групата на скала од нула до 100.
Австралија, Канада, Јапонија и Италија добиле просечни оценки во средниот до високиот опсег од 60 поени.
Позитивно се оценети и Велика Британија, Франција, Германија, Мексико, Јужна Кореја и Бразил.
Најниска просечна оценка добила Русија – 27 од 100.
Дури 51 отсто од испитаниците имаат „многу студен“ став кон Русија, а 23 отсто ѝ дале најниска можна оценка – нула.
Кина е оценета со 37, а Саудиска Арабија со 36 поени.
Индија, Турција, Јужна Африка, Индонезија и Аргентина добиле оценки меѓу 45 и 48, при што кај дел од нив е висок и уделот на неутрални ставови.
Демократите генерално попозитивни
Истражувањето покажува и изразени партиски разлики.
Демократите и независните наклонети кон Демократската партија генерално оценуваат повеќе земји попозитивно од републиканците.
Најголеми разлики има кај Канада и Мексико. Демократите ги оценуваат овие две земји за 19, односно 18 поени повисоко од републиканците.
Русија е исклучок – републиканците имаат нешто потопол однос кон Москва од демократите, иако и кај двете групи Русија останува меѓу најнегативно оценетите земји.
Американците на возраст од 18 до 49 години имаат попозитивни ставови кон Кина, Индонезија, Мексико, Русија, Јужна Африка и Турција во споредба со оние над 50 години.
Постарите испитаници, пак, попозитивно ги оценуваат Австралија и Индија.
Кај Русија и Кина разликата е особено изразена – Американците над 50 години многу почесто даваат „многу студени“ оценки.
Јапонија и Мексико растат, Канада и Британија се ладат
Во споредба со претходните години, ставовите кон неколку земји значително се промениле.
Јапонија денес има просечна оценка 65, наспроти 57 во 2016 година. Уделот на Американци со позитивен став кон Јапонија пораснал од 44 на 65 отсто.
Мексико се зголемил од просечни 50 поени во 2016 на 55 денес.
Кина исто така бележи подобрување – од 28 во 2021 на 37 денес – иако останува генерално негативно оценета.
Канада, пак, паднала од 71 поен во 2018 на 67, додека Велика Британија се намалила од 66 во 2016 на 60 денес.
Индија паднала од 51 во 2018 на 46, а Русија останува ниско оценета со 27, што е под нивото од 35 поени во 2016 година.