Со маршеви, протести и молитви, граѓаните денеска се потсетуваат на трагедијата во ноќниот клуб „Пулс“ во Кочани, каде што пред шест месеци 62 млади лица загинаа во пожар – најголемата цивилна катастрофа во поновата историја на Македонија.
Во Кочани, родителите на жртвите организираа „Марш за ангелите“, кој започна од Паркот на револуцијата и се движи низ централните улици. Слични собири се најавени и во Скопје и Штип, каде што граѓаните ќе запалат свеќи и ќе оддадат почит со минута молк.
Здружението „16 март 2025 – Кочани“, формирано од семејствата на загинатите, порача дека маршевите се не само во знак на сеќавање, туку и како повик за правда. „Шест месеци одам на гроб, а виновниците си шетаат,“ напиша мајка на една од жртвите на социјалните мрежи, предизвикувајќи широки реакции во јавноста.
Истрагата за несреќата сè уште трае. Обвинителството нема поднесено обвинителен акт, а дел од семејствата обвинуваат за одолговлекување. Според официјалните информации, пожарот во „Пулс“ започнал во делот каде што бил складиран запаллив материјал, но целосниот извештај за причините и евентуалните пропусти на институциите не е објавен.
Покрај маршот, во Кочани беше одржан и црковен помен на гробиштата каде што се погребани дел од жртвите.
Трагедијата во „Пулс“ ја отвори и дебатата за безбедноста на ноќните клубови, спроведувањето на инспекциските контроли и капацитетот на противпожарните служби. Владата најави реформи, но семејствата на загинатите велат дека „времето минува, а одговорност нема“.