Лидерите на Европската унија по маратонски самит постигнаа договор за обезбедување финансиска поддршка за Украина преку заедничко задолжување на ЕУ, додека планот за користење на замрзнатите руски средства повторно не доби едногласна поддршка, објави POLITICO.
По повеќе од 16 часа разговори, договорот беше постигнат и покрај противењето на три земји-членки, кои одбија да се приклучат на механизмот за заеднички долг. Повеќето земји првично се залагаа за користење на замрзнатите руски средства за финансирање на воените напори на Киев, но тој предлог пропадна поради отпорот на Белгија и резервите на неколку други држави.
Белгискиот премиер Барт де Вевер, кој од почетокот се спротивставуваше на идејата за користење на руските средства поради ризик од руски одмазднички мерки, на крајот одигра клучна улога во насочувањето на лидерите кон алтернативното решение – заедничко задолжување, кое малкумина го посакуваа, но мнозинството го прифатија како компромис.
Италијанската премиерка Џорџа Мелони, според европски дипломати, се наметна како клучен фактор во завршната фаза од преговорите, внимателно темпирајќи ја својата интервенција откако стана јасно дека планот за заем поткрепен со руски средства е мртов.
Претседателот на Европскиот совет, Антонио Кошта, успеа да го заврши самитот во еден ден, иако многумина очекуваа разговорите да продолжат и следниот ден, задржувајќи дистанца од поединечните опции и фокусирајќи се на постигнување договор, пишува POLITICO.
Меѓу губитниците на самитот се германскиот канцелар Фридрих Мерц и претседателката на Европската комисија Урсула фон дер Лајен, кои силно го туркаа планот за користење на замрзнатите руски средства и се спротивставуваа на заедничкото задолжување. Иако техничката работа за можни репарациски заеми ќе продолжи, исходот претставува сериозен удар за нивната позиција,.
Унгарија, Словачка и Чешка краткорочно избегнаа директни финансиски обврски кон Украина, но договорот сепак овозможува средствата да стигнат до Киев, што може дополнително да ги изолира овие земји во рамките на ЕУ, наведува POLITICO.