Американскиот потпретседател Џеј Ди Венс води во неформалната анкета на Конзервативната политичка акциона конференција (CPAC) за потенцијален кандидат на Републиканската партија на претседателските избори во 2028 година, додека државниот секретар Марко Рубио бележи значителен раст на поддршката.
Во анкетата, спроведена меѓу околу 1.600 учесници на четиридневниот настан, Венс добил 53% од гласовите, задржувајќи ја водечката позиција втора година по ред.
Рубио освоил 35%, значително повеќе во однос на претходната година кога беше рангиран пониско.
Анкетата на CPAC се смета за индикатор за расположението во конзервативната база, иако не секогаш точно го предвидува конечниот кандидат.
Резултатите доаѓаат во чувствителен период за Републиканската партија, на помалку од осум месеци пред конгресните избори во ноември, на кои партијата се обидува да го задржи мнозинството.
Во меѓувреме, рејтингот на актуелниот претседател Доналд Трамп бележи пад, при што според анкета на Ројтерс/Ипсос, само 36% од Американците го одобруваат неговото работење.
Аналитичарите го поврзуваат падот со тековната војна со Иран и економските притисоци, вклучително и растот на цените на горивата.
Иако Трамп навести можност за трет мандат, американскиот закон го ограничува бројот на мандати на два, што ја отвора трката за негов наследник во 2028 година.
Венс се смета за претставник на поизолационистичко крило во рамки на партијата, додека Рубио има подолга политичка кариера и поцврст став во надворешната политика.
Анкетата укажува на продолжување на влијанието на Трамп врз Републиканската партија, која во последните години се консолидира околу неговата политика.