Универзитетот на Југоисточна Европа (УЈИЕ) и Здружението ХЕРА – Асоцијација за здравствена едукација и истражување, потпишаа меморандум за соработка, воспоставувајќи стратешко партнерство насочено кон развој на практичната настава, професионално унапредување и реализација на заеднички активности во повеќе области од општествено значење.
Меморандумот го потпишаа ректорот на УЈИЕ, Садудин Ибраими, и претседателката на ХЕРА, Румена Којчевска-Ѓердовска, со што ја потврдија заложбата на двете институции за поврзување на академското знаење со практичната работа.
Соработката има за цел да ги зајакне академските и истражувачките капацитети во области како психологија, јавна администрација, јавни политики и политички науки, со акцент на прашања како родово базирано насилство, социјална инклузија и заштита на човековите права.
Во рамки на меморандумот, на студентите на УЈИЕ ќе им се овозможи практична настава и студиски посети во советувалиштата на ХЕРА, додека академскиот кадар ќе учествува во заеднички професионални, истражувачки и едукативни активности.
Двете страни, исто така, ќе соработуваат во организирање на јавни и научни настани, како и во аплицирање и спроведување на домашни и меѓународни проекти.