Работниците во Европа имаат значително различни работни навики, а разликата меѓу земјите со најдолга и најкратка работна недела достигнува речиси осум часа, покажуваат најновите податоци на Евростат.
Според статистиката за 2025 година, најдолга просечна работна недела во Европската Унија имаат работниците во Грција со 39,6 часа. Следуваат Бугарија и Полска со по 38,7 часа, додека Литванија бележи просек од 38,4 часа неделно.
На спротивниот крај од листата е Холандија, каде просечната работна недела изнесува само 31,9 часа. По неа следуваат Данска и Германија со по 33,9 часа, како и Австрија со 34 часа.
Просекот на Европската Унија изнесува околу 36 работни часа неделно, што е помалку отколку пред една деценија.
Експертите објаснуваат дека разликите не се должат само на работната етика, туку и на економската структура, распространетоста на скратеното работно време и колективните договори. Земјите со голем удел на вработени со скратено работно време, како Холандија, природно имаат пократка просечна работна недела.
Податоците покажуваат и дека Балканот и источниот дел од Европа генерално бележат подолги работни недели, додека северните и западните европски држави имаат пократко работно време и поголем баланс меѓу работата и приватниот живот.