Глобалното лично богатство во 2025 година порасна за 10,8 проценти, што претставува најбрз годишен раст од 2017 година и трета последователна година на зголемување, покажува UBS Global Wealth Report 2026.
Најсилен раст е регистриран во регионот Европа, Блискиот Исток и Африка (EMEA), каде богатството се зголемило за 17,5 проценти, пред Америка со 8,5 проценти и Азија-Пацифик со 5,9 проценти.
Извештајот покажува дека Швајцарија останува најбогатата земја во светот, со просечно богатство од 910.382 американски долари по возрасен жител. Следуваат САД со 696.277 долари, Луксембург со 654.732 долари, како и Хонг Конг, Австралија, Сингапур и Данска.
Кога се анализира медијаната на богатството, која подобро ја претставува финансиската состојба на просечното домаќинство бидејќи не е под влијание на најбогатите поединци, Луксембург е прв во светот со 394.005 долари, пред Белгија, Австралија, Нов Зеланд и Данска. Швајцарија е осма, додека САД се дури на 28. место, што укажува на значително поголема концентрација на богатството кај најбогатите Американци.
Меѓу најголемите европски економии, Германија има највисоко просечно богатство, но според медијаната заостанува зад Италија, Франција и Велика Британија, што повторно укажува на поголеми разлики во распределбата на богатството.
Извештајот покажува и дека бројот на доларски милионери се зголемил за 1,5 проценти, односно за речиси еден милион нови милионери во текот на 2025 година – повеќе од 2.600 секој ден. Само во САД се појавиле повеќе од 440.000 нови милионери, а по нив следуваат Кина, Јапонија, Германија, Велика Британија и Франција.
Повеќе од половина од светското лично богатство и понатаму е концентрирано во САД и Кина, што ја потврдува нивната доминантна позиција во глобалната економија.
Истовремено, уделот на луѓето со богатство под 10.000 долари се намалил од речиси 75 проценти во 2000 година на нешто повеќе од 41 процент во 2025 година, што укажува на постепено зголемување на богатството кај средната класа на глобално ниво.
Во извештајот се наведува дека во иднина растот на богатството сè повеќе ќе зависи од пристапот до финансиски пазари, инвестициски средства и можностите за диверзификација на имотот, а не само од сопственоста на недвижности. UBS предупредува дека разликата меѓу просечното и медијаното богатство продолжува да расте, што покажува дека придобивките од економскиот раст не се распределуваат подеднакво меѓу домаќинствата.