СВР Битола поднесе кривични пријави против три физички и едно правно лице од Прилеп поради сомнение дека преку продажба и прикривање отпадно железо го оштетиле АД „Тутунски комбинат“ Прилеп за повеќе од 3,3 милиони денари, соопшти Министерството за внатрешни работи.
Кривична пријава е поднесена против Љ.Б. (59) за „проневера во службата“, „злоупотреба на службената положба и овластување“ и „фалсификување службена исправа“, против К.С. (60) за „несовесно работење во службата“, како и против Ј.Д. (41) за „прикривање“ и „фалсификување службена исправа“.
Пријавено е и правно лице од прилепското село Мало Коњари, чиј сопственик и управител е Ј.Д., поради сомнение за „прикривање“.
Според МВР, Љ.Б. во 2021 и 2022 година работел во Тутунски комбинат како координатор на група за обезбедување, додека К.С. во истиот период бил генерален извршен директор на компанијата. Фирмата на Ј.Д. била овластена за откуп и продажба на отпадни материјали и имала договор со Тутунски комбинат.
Истрагата се однесува на продажба на отпад во првото тримесечје од 2022 година. Полицијата тврди дека Љ.Б., по негов усмен предлог до тогашниот генерален извршен директор К.С., добил можност да ја спроведе продажбата на отпадот наместо референтот задолжен за управување со отпад.
Во февруари 2022 година, според кривичната пријава, Љ.Б. со помош на Ј.Д. прикрил најмалку 185.000 килограми отпадно железо од Работната единица „Заводи – Мажучиште“. Железото, како што наведува МВР, не било евидентирано на сметка на Тутунски комбинат, туку било предадено на фирмата од Мало Коњари.
Полицијата се сомнева дека наместо парите да бидат уплатени на сметката на Тутунски комбинат, фирмата изготвила фиктивни откупни белешки на имиња на осум физички лица, кои биле блиски со Љ.Б. Во белешките во просек биле прикажувани по околу 25.000 килограми отпадно железо по лице, заедно со изјави за неговото потекло.
Парите потоа биле префрлани на банкарските сметки на седум физички лица, како и на личната сметка на Љ.Б. Според МВР, лицата ги подигнувале средствата во готовина и му ги предавале на првопријавениот.
На овој начин биле префрлени вкупно 3.338.328 денари, сума за која, според полицијата, бил оштетен Тутунски комбинат.
Одделно, фирмата од Мало Коњари на Тутунски комбинат му исплатила 1.274.560 денари по основ на продажба на отпадното железо.
Станува збор за наводи содржани во полициска кривична пријава. Поднесувањето кривична пријава не значи утврдена вина, за што одлучува судот во соодветна постапка.