Демократската унија за интеграција побара распуштање на Собранието и одржување предвремени парламентарни избори, откако премиерот Христијан Мицкоски изразил подготвеност за избори доколку тоа го побара опозицијата.
„Го бараме тоа“, соопшти ДУИ, оценувајќи дека земјата има потреба од нов политички мандат.
Од партијата тврдат дека Владата го загубила легитимитетот поради, како што наведуваат, „европската изолација, деградирањето на меѓуетничките односи, нарушувањето на Охридскиот договор и слабеењето на застапеноста на Албанците во институциите“.
ДУИ побара изјавата на премиерот веднаш да биде преточена во конкретна политичка постапка.
„Бараме во следните денови да се утврди најбрзиот уставен рок, да започнат изборните подготовки и на граѓаните да им се даде можност да одлучат за правецот во кој ќе се движи земјата“, се наведува во реакцијата.
Според ДУИ, доколку понудата на Мицкоски е сериозна, нема причина за одложување или дополнителни политички калкулации.
„Опозицијата го даде својот одговор. ДУИ е подготвена. Нека се распушти Собранието. Нека се одреди датумот. Да одиме на избори“, порача партијата.