Македонската фармацевтска компанија „Алкалоид“ го доби меѓународниот сертификат Top Employer 2026, со што стана првата домашна компанија со ова признание, се наведува во денешното соопштение.
Сертификатот го доделува Top Employers Institute, организација со седиште во Холандија, која ги оценува компаниите според нивните политики, процеси и практики во управувањето со човечките ресурси.
Методологијата на институтот опфаќа шест клучни области и 20 теми, меѓу кои стратегијата за човечки ресурси, лидерството, работната средина, привлекувањето и развојот на таленти, благосостојбата на вработените и корпоративните вредности.
Според компанијата, сертификацијата претставува признание за долгогодишното вложување во знаењето, професионалното усовршување и подобрувањето на условите за работа.
Генералниот директор и претседател на Управниот одбор на „Алкалоид“, Живко Мукаетов, изјави дека признанието има посебно значење бидејќи компанијата годинава одбележува 90 години од основањето.
„За нас тоа претставува потврда за долгогодишната посветеност на развојот на компанијата, континуираното унапредување на корпоративните практики и градењето култура заснована на доверба, почит и заеднички вредности“, изјави Мукаетов.
Тој нагласи дека компанијата ќе продолжи да инвестира во знаењето и професионалниот развој на вработените.
„Упатувам особена благодарност до сите алкалоидовци, чиј придонес е нераскинлив дел од ова заедничко достигнување“, додаде Мукаетов.
Од „Алкалоид“ соопштија дека развојот на човечките ресурси и подобрувањето на организациските практики остануваат меѓу стратешките приоритети на компанијата.
Сертификацијата се однесува на практиките на работодавачот во областа на човечките ресурси и не претставува оценка на фармацевтските производи или нивниот квалитет.