Детекција на пожар во почетна фаза и гасење на огнот пред да се прошири. На Симпозиумот за храна и земјоделство, Италијанската фондација ЦМЦЦ промовираше паметен дрон кој со помош на вештачка интелигенција работи во превенција на пожари.
Дронот се движи по еднаш обележана рута, собира податоци и прави анализа за да може да предвиди каде има најголема опасност за избувнување на пожар. Во првиот момент кога ќе се појави опасност, следејќи ги сите временски параметри, дронот сам лета на истата рута и со себе носи т.н. бомби полни со течност, ги исфрла на местото со потенцијална опасност и спречува оган.
Според ЦМЦЦ, дронови биле поставени во областа Пулиа, Италија и последната сезона не бил забележан пожар токму поради овој апарат.
Од Италијанската фондација објаснуваат дека климатските промени се особено голем „потпалувач“ кој се случува набрзина и остава трајни последици, и затоа овој дрон може да биде сериозно решение за бројни пожари и да спречи милионски штети.