Премиерот Димитар Ковачевски денеска беше домаќин на 54 студенти од 17 земји во светот од престижните американски универзитети Харвард и Масачусетс Институтот за технологија, кои деновиве се во посета на земјите од иницијативата Отворен Балкан.
“Ми беше особено драго што повторно имав можност да се потсетам на моите професорски денови и да разменам со нив идеи и размислувања околу достигнувањата на нашата држава и нејзините планови за раст.”, вели Ковачевски.
Тој вели дека пред гостите ги претставил нашите перспективи на економски и политички план, истакнувајќи дека “нашата држава се докажа како кредибилен партнер на НАТО и ЕУ, каде цврсто го заштитивме нашиот македонски идентитет и нашиот македонски јазик.”
“Испратив силна порака – Северна Македонија создава поволна средина со огромни потенцијали за регионот и светот и отвора нови видици посебно за младите. Овие перспективи се уште поголеми во рамките на Отворен Балкан, каде можностите за силни партнерства и инвестиции се огромни.”, вели Ковачевски во изјава објавена на Фејсбук.